पोलिसांनी पुन्हा पकडली गांजा ची शेती ,
स्थानिक गुन्हे शाखेची कारवाई; एकास अटक
अमिन शाह
बुलडाणा ,
साखरखेर्डा पोलीस स्टेशन हद्दीतील मलकापूर पांग्रा शिवारात तुरीच्या शेतात गांजाची बेकायदेशीर लागवड केल्याचा धक्कादायक प्रकार उघडकीस आला आहे. स्थानिक गुन्हे शाखेच्या पथकाने कारवाई करत तब्बल साडेबारा लाख रुपयांचा गांजा जप्त केला असून एका आरोपीस अटक करण्यात आली आहे.
मलकापूर पांग्रा येथील गट क्रमांक ५०६ मध्ये तुरीच्या पिकामध्ये गांजाची लागवड करण्यात आल्याची माहिती स्थानिक गुन्हे शाखेच्या पथकाला मिळाली होती. या माहितीच्या आधारे दि. १८ डिसेंबर रोजी दुपारी छापा टाकण्यात आला. महसूल कर्मचाऱ्यांच्या उपस्थितीत पंचनामा करून कारवाई करण्यात आली. या छाप्यात गांजाची ओलसर झाडे वजन ७६ किलो ६ ग्रॅम, किंमत ११ लाख ४० हजार ९०० रुपये तसेच गांजाची सुकलेली झाडे वजन ५ किलो ५६० ग्रॅम, किंमत १ लाख ११ हजार २०० रुपये असा एकूण ८१ किलो ६२० ग्रॅम वजनाचा आणि १२ लाख ५२ हजार १०० रुपये किमतीचा मुद्देमाल जप्त करण्यात आला आहे.
या प्रकरणी सुधाकर संपतराव गायकवाड (वय ६५, रा. मलकापूर पांग्रा) यास अटक करण्यात आली आहे. ही कारवाई पोलीस उपनिरीक्षक यशोदा कणसे, पोलीस हवालदार दिगंबर कपाटे, गजानन दराडे, वनीता शिंगणे, विजय वारूळे, दीपक वायाळ, मंगेश सनगाळे, मनोज खर्डे, समाधान टेकाळे यांच्या पथकाने केली. या प्रकरणाचा पुढील तपास साखरखेर्डा पोलीस ठाण्याचे ठाणेदार गजानन करेवाड यांच्या मार्गदर्शनाखाली दुय्यम ठाणेदार गणेश डोईफोडे हे करीत आहेत.
नाराजी ,
साखरखेर्डा पोलिसांनी या संदर्भात कमालिची गुप्तता ठेवली
पत्रकाराना आज दुपार पर्यंत माहिती दिली नाही ,
त्या मुळे नाराजी व्यक्त केली जात आहे ,
