अमिन शाह
अहमदनगर
श्रीगोंदा तालुक्यातील भिंगाण शिवारात घडलेली एक हृदयद्रावक घटना संपूर्ण परिसराला हादरवून गेली आहे. दुचाकीवरून प्रवास करताना पती-पत्नीमध्ये झालेल्या किरकोळ वादाने भीषण वळण घेतले. संतापाच्या भरात पतीने पत्नीवर दगडाने ठेचून व गळा आवळून खून करण्याचा प्रयत्न केला. मात्र, त्या दाम्पत्याच्या आठ वर्षांच्या चिमुकलीने आरडाओरडा करत माझ्या बापाने आईला मारलं, मला मदत करा असा टाहो फोडला आणि गावातील तरुणाई घटनास्थळी धावली. त्यांच्या वेळीच झालेल्या हस्तक्षेपामुळे आईचे प्राण थोडक्यात वाचले.
या संदर्भात मिळालेल्या माहिती नुसार
घोडेगाव येथील एक व्यक्ती आपल्या पत्नी व मुलीला घेण्यासाठी भोसा (ता. कर्जत) येथे गेला होता. दुसऱ्या दिवशी, रविवारी सकाळी जेवणानंतर ते घोडेगावकडे निघाले. परंतु, रस्त्यात भिंगाण शिवारात त्याने दुचाकी थांबवून पत्नीला तुरीच्या शेतात नेले आणि निर्दयपणे मारहाण सुरू केली. तिच्या डोक्यावर दगडाने वार करून गळा आवळण्याचा प्रयत्न केला. हा सर्व प्रकार पाहून घाबरलेली मुलगी पळत भिंगाण गावात आली आणि मदतीसाठी हाका मारल्या. तरुणांनी तत्काळ घटनास्थळी धाव घेत महिलेचा जीव वाचवला. सदर महिला गंभीर जखमी असून, तिला दौंड येथील खासगी रुग्णालयात दाखल करण्यात आले आहे.
सराईत गुन्हेगार पती फरार ,
माहितीनुसार, आरोपी पती हा सराईत गुन्हेगार असून त्याच्यावर यापूर्वीही अनेक गुन्हे दाखल आहेत. घटनेनंतर तो पसार झाला आहे. श्रीगोंदा पोलिसांनी त्याच्या विरुद्ध गुन्हा दाखल करण्याचे काम सुरू केले असून, पोलीस त्याच्या शोधात आहेत. जखमी महिलेच्या वडिलांनी भावनिक शब्दांत सांगितले की, आम्ही यापूर्वीही आमच्या जावयाविरुद्ध श्रीगोंदा पोलीस ठाण्यात तक्रार केली होती. पण, त्यावेळी कठोर कारवाई झाली नाही. पोलिसांनी गंभीरतेने घेतलं असतं, तर आज ही घटना घडली नसती.
चिमुकलीचे धाडस सलाम करण्यासारखे ,
या घटनेनंतर परिसरात हळहळ व्यक्त होत आहे. फक्त आठ वर्षांच्या मुलीने दाखवलेली समयसूचकता आणि धाडसामुळे तिच्या आईचे प्राण वाचले, याबद्दल सर्वत्र तिच्या धैर्याचे कौतुक होत आहे. श्रीगोंदा पोलीस पुढील तपास करत आहेत.
