दोन कुख्यात करोना बाधित कैदी गेले पळून ,

सर्वत्र शोधा शोध भीतीचे वातावरण ,

गुन्हा दाखल ,

अमीन शाह

औरंगाबादः कोरोनाची लागण झाल्यानंतर किलेअर्क परिसरातील कला महाविद्यालयाच्या कोविड सेंटरमध्ये दाखल करण्यात आलेल्या हर्सूल तुरूंगातील दोन कोरोना बाधित कैदी पळून गेल्याची घटना रविवारी रात्री घडली आहे. यामुळे पोलिस आणि प्रशासनाच्या कामकाजावरच प्रश्नचिन्ह उपस्थित होत आहे. या प्रकरणी बेगमपुरा पोलिस ठाण्यात गुन्हा दाखल करण्यात आला आहे.
हर्सूल कारागृहातील २९ कैद्यांना कोरोनाची लागण झाल्यानंतर त्यांच्यावर किलेअर्क परिसरातील कला महाविद्यालयाच्या कोविड सेंटरमध्ये उपचार सुरू करण्यात आले. रविवारी रात्री पावणे अकराच्या सुमारास बंदोबस्तावर असलेले पोलिस कर्मचारी लघुशंकेला गेल्याचे कळताच या कोविड सेंटरच्या पहिल्या मजल्यावरील दोन आरोपींनी खिडकीचे गज वाकवले आणि बेडशीटची दोरी बनवून तिच्या साह्याने खाली उतरत पळ काढला.
तेथे तैनात असलेल्या महापालिकेच्या कर्मचाऱ्यांनी ही बाब लक्षात आणून देताच तूरुंग अधिकारी कैलास काळे यांनी त्यांच्या कर्मचाऱ्यांसह मोटारसाकलवर या कैद्यांचा पाठलागही केला. दिल्लीगेट येथे हे दोन्ही कैदी अंधारात लपून बसल्याचे काळे यांना दिसले. त्यांनी या दोन्ही कैद्यांना थांबा असे वारंवार सांगितले. मात्र, ते अंधाराचा फायदा घेऊन पळून गेले. त्यानंतर आजूबाजूला त्यांचा शोध घेण्यात आला. मात्र कैदी आढळून आले नाही, असे काळे यांनी आपल्या फिर्यादीत नमूद केले आहे.
दोन कैद्यांपैकी एक कैदी आक्रम खान गयास खान हा औरंगाबादच्या जटवाडा येथील असून त्याच्याविरुद्ध छावणी पोलिस ठाण्यात ३०२, १२० (ब) चा गुन्हा दाखल आहे. दुसरा कैदी सय्यद सैफ सय्यद असद यांच्याविरुद्ध पुंडलिकनगर पोलिस ठाण्यात ४९८ ( अ) (ब)(क), ४२० चा गुन्हा दाखल आहे. तो औरंगाबादच्याच यासीम मशिदीजवळील नेहरुनगरचा रहिवासी आहे. आज सकाळ पासून पोलिसांनी चौकशी सुरु केली असून ते कुणाकडे जाऊ शकतात, या दृष्टिने शोध कार्य सुरु केले आहे.