अवघ्या चार तासात आरोपिला अटक ,
अमिन शाह
हिंगोलीच्या वसमत तालुक्यातील भेंडेगाव शिवारातील आखाड्यावर पत्नीने अनैतिक संबंधातून पतीची हत्या केल्याची घटना समोर आली आहे. प्रेमसंबंधांत अडथळा ठरत असल्याने पत्नीने प्रियकराच्या मदतीने पतीचा खून केल्याची खळबळजनक घटना घडली. कुरुंदा पोलिसांनी अवघ्या काही तासात या हत्येचा उलगडा केला आहे. रविवार, 24 ऑगस्ट रोजी रात्री उशिरा कुरुंदा पोलिस स्टेशनमध्ये गुन्हा दाखल करण्यात आला आहे.
मिळालेल्या माहितीनुसार, वसमत तालुक्यातील भेंडेगाव शिवारात शिवाजी राजाराम पोटे (35 रा. गवलेवाडी) हे एका शेतकऱ्याकडे सालगडी म्हणून कामाला होते. शेतातील आखाड्यावर ते त्यांच्या कुटुंबासोबत राहत होते. त्यांची पत्नी मंगल, एक मुलगा आणि एक मुलगी असं कुटुंब राहत होतं. त्यांचा मुलगा शिरड शहापूर येथील शाळेमध्ये शिक्षण घेत असल्यामुळे मंगल पोटे यांचं शाळेमध्ये जाणं-येणं होतं. तिथेच शाळेत स्वयंपाकी काम करणाऱ्या ज्ञानेश्वर ठोंबरे (रा.सारंगवाडी) यांच्यासोबत बोलणं व्हायचं. या बोलण्याचं रूपांतर प्रेमात झालं आणि प्रेम संबंध जुळले.
या अनैतिक संबंधाची माहिती शिवाजीला लागली आणि पती-पत्नीमध्ये वाद व्हायला सुरुवात झाली होती. पती अनैतिक संबंधाला अडथळा ठरत असल्याने मंगल आणि तिच्या प्रियकराने शिवाजी यांचा काटा काढायचा निर्णय घेतला. अनेकदा प्लॅनिंग करण्यात आलं होतं. त्यानुसार शनिवारी मध्यरात्री मंगल आणि तिच्या प्रियकराने शिवाजी यांच्या डोक्यात लाकडाने वार केले. यात त्यांचा मृत्यू झाला. नंतर मृतदेह जवळच असलेल्या नाल्यामध्ये फेकून दिला. सकाळी मंगलने मुलांना झोपेतून उठून वडील कुठे दिसत नाहीत याचा शोध घेण्यास सुरुवात केली. कामावरील शिवाजी आखाड्यावर दिसत नसल्याने याची कल्पना शेतमालकाला देण्यात आली. यामुळे शेत मालकाचा भाऊ आखाड्यावर आला, सर्वांनी शोध घेतला असता शिवाजीचा मृतदेह नाल्यामध्ये आढळून आला.
या घटनेची माहिती तात्काळ कुरुंदा पोलीस स्टेशनला देण्यात आली. पोलिसांना माहिती मिळताच घटनास्थळी पाहाणी केली. पोलिसांनी पाहणी केली असता सदरची घटना घातपात असल्याचं निदर्शनास आलं. त्यानंतर पोलीस अधिक्षक यांच्या मार्गदर्शनाखाली फॉरेन्सिक टीम आणि घटनेच्या तपास अनुषंगाने डॉग स्कॉड बोलावण्यात आले.
घटनेची सखोल चौकशी करुन मृताच्या पत्नीचे ज्ञानेश्वर ठोंबरे याच्यासोबत अनैतिक संबंध असल्याने त्यातून त्यांनी कट कारस्थान रचून शिवाजीची हत्या केल्याचं समोर आलं. आरोपींना तात्काळ ताब्यात घेण्यात आलं. मृतदेहावर वसमत ग्रामीण रुग्णालयात शवविच्छेदन करण्यात आलं.
पोलिसांनी अतिशय शिताफिने तपास करून अवघ्या चार तासात घटनेला वाचा फोडली आणि आरोपीला ताब्यात घेतलं. या घटनेत पोलीस उपनिरीक्षक कारामुंगे यांनी गुन्हा दाखल केला, तर सहाय्यक पोलीस निरीक्षक आर एम निरदोडे हे या घटनेचा पुढील तपास करत आहेत.
