नगर परिषद सफाई कामगारांवर अन्याय; १४ एप्रिल रोजी जिल्हाधिकाऱ्यांच्या निवासस्थानी उपोषणाचा इशारा

यवतमाळ, दि. 12 एप्रिल: नगर परिषद यवतमाळमधील अस्थायी सफाई कामगारांवर अन्याय होत असल्याचा आरोप करत “ब्लू भीम टायगर अस्थायी कामगार सेना”ने आंदोलनाचा इशारा दिला आहे. संघटनेचे अध्यक्ष श्यामदादा अवधूतराव बनसोड यांनी जिल्हाधिकाऱ्यांना दिलेल्या निवेदनात हे आंदोलन करण्याबाबत कळवले आहे.

निवेदनात त्यांनी म्हटले आहे की, १ एप्रिल ते १० एप्रिल २०२५ या कालावधीत सुमारे ५० अस्थायी सफाई कामगारांना कोणतीही पूर्वसूचना न देता कामावरून कमी करण्यात आले. यामुळे त्या कामगारांच्या कुटुंबीयांवर उपासमारीची वेळ आली आहे. तसेच, एका दिवसाचीही गैरहजेरी झाल्यास कामावरून बंद करण्याचा कंत्राटदारांचा मनमानीपणा सुरू आहे, असा आरोप संघटनेने केला आहे.

कामावरून कमी केलेले सर्व कामगार १३ एप्रिलपर्यंत पुन्हा कामावर घेतले गेले नाहीत, तर १४ एप्रिल रोजी सकाळी ७ वाजता जिल्हाधिकारी यांच्या निवासस्थानी उपोषण आंदोलन करण्यात येईल, असा इशाराही संघटनेने दिला आहे.

या निवेदनाची प्रत जिल्हा पोलीस अधीक्षक, सरकारी कामगार अधिकारी, नगर परिषदेचे मुख्याधिकारी तसेच शहर पोलीस निरीक्षक यांच्याकडेही देण्यात आली आहे.

या आंदोलनामुळे शहरात कायदा आणि सुव्यवस्थेचा प्रश्न निर्माण होऊ नये म्हणून प्रशासनाने तात्काळ लक्ष घालावे, अशी मागणी होत आहे.