रावेर (शरीफ शेख)
जगभरात थैमान घातलेल्या कोरोना संसर्गामुळे सुरु असलेल्या संचारबंदी काळात रावेर तालुक्यातील खिरवड येथे श्री दत्त छाया प्रतिष्ठान व राज कंस्ट्रक्शन चे अध्यक्ष राजेंद्र पंढरीनाथ चौधरी यांच्या तर्फे गरजूंना जीवनावश्यक किरणा साहित्य तहसीलदार उशारणी देवगुणे यांच्या हस्ते वाटप करण्यात आले.
देशात कोरोनाचा संसर्गामुळे संचारबंदी सुरु आहे. उद्योग, व्यवसाय बंद आहेत. त्यामुळे गोर बरीब जनता व मजुरांना रोजगार मिळत नसल्याने व त्यांचे जवळील जीवनावश्यक खाद्य सामग्रीही संपण्याच्या स्थितीत आहे. गोर गरिबांवर उपासमारीची वेळ आल्याने त्यांची चूल सतत पेटत रहावी तसेच शासनाच्या आवाहनास प्रतिसाद देत खिरवड येथील प्रतिष्ठीत शेतकरी, समाजसेवक, श्री दत्त छाया प्रतिष्ठान व श्री दत्तछाया तोल काटा व राज कंस्ट्रक्शन चे अध्यक्ष तथा माजी सरपंच ग्रा.पं. खिरवड, माजी चेअरमन रावेर तालुका खरेदी विक्री संघ तसेच रावेर पं.स. च्या माजी उपसभापती रेखाबाई चौधरी यांचे पती राजेंद्र पंढरीनाथ चौधरी यांच्या तर्फे गरजूंना जीवनावश्यक किरणा साहित्य वितरीत करण्यात आले.
तेल, साखर, चहा पावडर, मीठ, तूर डाळ, मुग डाळ, कांदे, मिरची पावडर, साबण आदी जीवनावश्यक किराणा साहित्याची पिशवी तहसीलदार उषाराणी देवगुणे यांच्या हस्ते वितरीत करण्यात आले. यावेळी नायब तहसिलदार संजय तायडे, सर्कल टोंगळे, सरपंच व राष्ट्रवादी तालुका अध्यक्ष निळकंठ चौधरी, उपसरपंच विनोद चौधरी, तलाठी राजेंद्र झामरे, ग्रामसेवक एच. डी. शिरसाठ, आरोग्य सेविका, आशा वर्कर, अंगणवाडी सेविका आदी उपस्थित होते.
श्री. चौधरी यांच्या या सामाजिक कार्याबद्दल परिसरात त्यांचे कौतुक होत असून गोर गरिबांनी त्यांचे आभार व्यक्त केले आहे.
