अखेर घाटंजी येथील 14 आरोपीविरुद्ध दिग्रस येथील प्रथम श्रेणी न्यायदंडाधिकारी यांच्या न्यायालयात दोषारोपपत्र दाखल..!

( अयनुद्दीन सोलंकी )
————————-
घाटंजी – घाटंजी तालुक्यातील घाटी येथील जान्हवी उर्फ मयुरी संजय आडे व दिपीका प्रा. रवि आडे यांचा आपसी संगणमताने एकमेकास चिथावणी देउन व मदत पुरवुन संयुक्त इराद्याने घाटंजी येथील सासरी नांदत असतांना अमानविय मारहाण करून अश्लिल शिविगाळ करुन शारीरिक व मानसिक छळ केल्या प्रकरणी अखेर दिग्रस पोलीसांनी १४ आरोपींविरुद्ध दिग्रस येथील प्रथम श्रेणी न्यायदंडाधिकारी न्यायालयात दोषारोपपत्र दाखल केले आहे. सदर प्रकरणात आरोपींचा जामीन अद्यापही मंजुर झालेला नसुन सदर प्रकरणात न्यायालयात उपस्थित राहण्यासाठी पुढील सुनावणी २३ जानेवारी २०२३ रोजी आहे. सदर प्रकरणाचा तपास दिग्रस पोलीस ठाण्याचे सहाय्यक पोलीस निरीक्षक विजय रत्नपारखी यांनी केला होता.

दरम्यान, आरोपी मयुरी किसनराव आडे हिने महाराष्ट्र शासनातर्फे ठाणेदार पोलीस स्टेशन दिग्रस व ईतरांविरुद्ध मुंबई उच्च न्यायालयाच्या नागपूर खंडपीठात फौजदारी अर्ज (अपील) ४२९ व ४३१/२०२१ उच्च न्यायालयाचे फौजदारी वकील ॲड. राजेंद्र डागा मार्फत दाखल केला होता. सदर प्रकरणात उच्च न्यायालयाचे न्यायमूर्तीद्वय झेड. ए. हक्क व अमीत बी. बोरकर खंडपिठाने स्थगिती दिली होती. मात्र, मुंबई उच्च न्यायालयाच्या नागपूर खंडपीठाचे न्यायमूर्तीद्वय सुनिल बी. शुक्रे व जी. ए. सानम यांनी १८ जुलै रोजी सदरचा अर्ज फेटाळून दोषारोपपत्र दाखल करण्याचे आदेश दिग्रस पोलीसांना दिले होते. अखेर घाटंजी येथील एकाच कुटुंबातील १४ आरोपी विरुद्ध दिग्रस येथील न्यायालयात दोषारोपपत्र दाखल करण्यात आले आहे.

एकंदरीत सदर प्रकरणात घाटंजी येथील एकाच कुटुंबातील १४ आरोपी विरुद्ध दिग्रस येथील न्यायालयात दोषारोपपत्र दाखल झाल्याने घाटंजी तालुक्यात मात्र खळबळ निर्माण झाली आहे.

सदर प्रकरणात संजय नामदेवराव आडे, गिलाणी कला व वाणिज्य महाविद्यालयाचे प्रा. रवि नामदेवराव आडे, वडील नामदेवराव आडे, आई नर्मदा आडे, भाउ प्रविण आडे, विना आडे, मयुरी किसनराव आडे आदीं १४ आरोपींचा समावेश आहे. विशेष म्हणजे जान्हवी आडे हिच्या तक्रारीवरून घाटंजी येथील पती संजय आडेसह ७ आरोपी विरुद्ध भादंवि कलम ४९८ (अ), ३२३, ५०४, ५०६ व ३४ अंतर्गत गुन्हा नोंदविण्यात आला होता. तर दुसरी बहीण दिपीका प्रा. रवि आडे हिच्या तक्रारीवरून प्रा. रवि आडेसह ७ आरोपी विरुद्ध अशाच प्रकारचा दुसरा गुन्हा दिग्रस पोलीस ठाण्यात दाखल केला होता. तथापि, जान्हवी आडे व दिपीका आडे यांनी या पुर्वी घाटंजी पोलीस ठाण्यात 18 जानेवारी 2020 रोजी आडे कुटूंबियाविरुद्ध रिपोर्ट दाखल केला होता. मात्र, घाटंजी पोलीसांनी फक्त दोघींचा मेडीकल केला होता. मात्र, गुन्हा वगैरे दाखल केला नव्हता, हे येथे उल्लेखनीय.

तथापि, आरोपींतातर्फे ॲड. ए. एम. पवार हे दिग्रस न्यायालयात काम पाहत आहे.