तालुकास्तरीय विज्ञान प्रदर्शनात सर सैयद अहमद खान उर्दू ज्युनिअर कॉलेजचा डंका
२०६ संस्थांमध्ये ‘वॉटर रेस्क्यू बोट’ मॉडेलला प्रथम क्रमांक ,
चिखली :
चिखली तालुक्यात १५ व १६ डिसेंबर रोजी पार पडलेल्या तालुकास्तरीय विज्ञान प्रदर्शन २०२५–२६ मध्ये सर सैयद अहमद खान उर्दू ज्युनिअर कॉलेज ऑफ आर्ट्स अँड सायन्स, अमडापूर (ता. चिखली, जि. बुलढाणा) या महाविद्यालयाने उल्लेखनीय यश संपादन केले आहे. तब्बल २०६ शाळा व महाविद्यालयांमधील स्पर्धकांना मागे टाकत महाविद्यालयाच्या विद्यार्थ्यांनी सादर केलेल्या ‘वॉटर रेस्क्यू बोट’ या नाविन्यपूर्ण मॉडेलला प्रथम क्रमांक मिळाला आहे.
आपत्ती व्यवस्थापन व जलअपघातांमध्ये जीव वाचवण्यासाठी उपयुक्त ठरणाऱ्या या मॉडेलने परीक्षकांचे विशेष लक्ष वेधून घेतले. तांत्रिक अचूकता, सामाजिक उपयुक्तता आणि सादरीकरणातील स्पष्टता या निकषांवर या प्रकल्पाला सर्वाधिक गुण मिळाले.
या यशामागे महाविद्यालयाचे मार्गदर्शक शिक्षक प्रा. मोहम्मद मोईन अख्तर सर आणि प्रा. अब्दुल रहमान सर यांचे मोलाचे मार्गदर्शन लाभले. त्यांच्या सातत्यपूर्ण मेहनतीमुळे आणि विद्यार्थ्यांच्या चिकाटीमुळे हे यश शक्य झाले, अशी भावना उपस्थित मान्यवरांनी व्यक्त केली.
या अभूतपूर्व यशाबद्दल संस्था अध्यक्ष शेख आजम शेख कासम, संस्था सचिव शेख जफर शेख जफर पटेल, तसेच महाविद्यालयातील सर्व शिक्षक व शिक्षकेतर कर्मचाऱ्यांनी विजयी विद्यार्थ्यांचे आणि मार्गदर्शक शिक्षकांचे मनःपूर्वक अभिनंदन केले.
या यशामुळे सर सैयद अहमद खान उर्दू ज्युनिअर कॉलेजचे नाव तालुकास्तरावर उज्वल झाले असून, हा प्रकल्प पुढील जिल्हास्तरीय विज्ञान प्रदर्शनासाठी चिखली तालुक्याचे प्रतिनिधित्व करणार आहे. या विजयामुळे परिसरात आनंदाचे वातावरण निर्माण झाले असून महाविद्यालयाच्या शैक्षणिक गुणवत्तेची पुन्हा एकदा प्रचिती आली आहे.
