हेल्मेट ही झाले चकना चूर.
लक्ष्मण बिलोरे – घनसावंगी
जालना – जाफ्राबाद तालुक्यातील हिवरा बळी येथील दोन युवक औरंगाबाद येथील दवाखान्यामध्ये उपचार घेऊन दुचाकीवरून परत येत असताना अकोला देव चौफुलीवर अज्ञात वाहनाच्या धडकेत झालेल्या अपघातात एक जण जागीच ठार झाला तर एकजण गंभीर जखमी झाला. याबाबत अधिक माहिती अशी की, हिवरा बळी येथील अमोल लोखंडे याला औरंगाबाद येथे खाजगी रुग्णालयात चेक अप साठी कृष्णा लोखंडे दुचाकीवर घेऊन गेले होते. दरम्यान तपासणी करून आपल्या गावाकडे परतत असताना टेंभुर्णी / देऊलगांवराजा रोडवर अकोला देव चौफुलीवर भरधाव जाणाऱ्या अज्ञात वाहनाने त्यांच्या दुचाकीला धडक दिली.
यामध्ये कृष्णा संतोष लोखंडे ( वय 32 वर्षे) याचा जागीच मृत्यू झाला तर अमोल दगडुबा लोखंडे (वय 29 वर्षे) हा गंभीररीत्या जखमी झाला. दोघांनाही तातडीने अकोला देव येथील युवकांनी टेंभुर्णीच्या ग्रामीण रुग्णालयात दाखल केले .दरम्यान डॉ. अमोल वाघ यांनी त्यांना तपासून कृष्णा यांना मृत घोषित केले तर अमोल लोखंडे यांना प्राथमिक उपचार करून पुढील उपचारासाठी जालना येथे हलविले. घटनेची माहिती मिळताच भाजपाचे राजेश चव्हाण राष्ट्रवादीचे तालुकाध्यक्ष रामधन कळंबे यांनी तातडीने रुग्णालयात येऊन नातेवाईकांना सुविधा उपलब्ध करून दिल्या.
दरम्यान प्रेताची उत्तरीय तपासणी डॉ.अमोल वाघ यांनी केली. शोकाकुल वातावरणात हिवराबळी येथे कृष्णा लोखंडे यांच्यावर अंत्यसंस्कार करण्यात आले. या वेळी हेल्मेट असल्या मुळे थोडा बचाव झाला असेल असे वाटले नाही.