गुप्तधन काढायला अन अडकले यवतमाळ पोलिसांच्या जाळ्यात….!

यवतमाळ – कारेगाव शिवारात गुप्तधन शोधण्यासाठी जादूटोण्याचा अवलंब करणाऱ्या 6 जणांविरुद्ध वडगाव ( जंगल ) पोलिसांनी कारवाई करून गुन्हा दाखल केला आहे. सदर कारवाई दिनांक 25 एप्रिलच्या मध्यरात्री रात्रगस्ती दरम्यान उघडकीस आली.

वडगाव ( जंगल ) पोलीस ठाण्याचे पथक रात्रगस्त करत असताना वरुड ते कारेगाव मार्गावर संशयास्पद स्थितीत उभी असलेली एक चारचाकी गाडी, वाहन क्रमांक ( MH01 BF 6026) आढळून आली. पोलिसांनी गाडीची तपासणी केली असता त्यामध्ये जादूटोण्याशी संबंधित विविध साहित्य आढळून आले.
यामध्ये लोखंडी साधने, अगरबत्ती, ज्वारीचे पीठ, काळ्या कपड्यांच्या बाहुल्या, त्रिशूल, रुद्राक्ष माळ, लिंबू, केस, सुया, ताबीज, रंगीबेरंगी धागे आदी वस्तूं होत्या. या सर्व साहित्याच्या आधारे संशयितांकडे पोलिसांनी चौकशी केली असता ते जमिनीतून गुप्तधन काढण्यासाठी आल्याची कबुली दिली. या प्रकरणी अशोक रामधन राठोड, रितेश रवि भगत, लिलेश्वर विश्वनाथ बावणे, कुंदन दारासिंग राठोड, विरेंद्र रमेश गायकवाड सर्व राहणार वाशीम जिल्ह्यातील मानोरा तालुक्यातील आमगव्हाण, कारखेडा, हरदा, वाई गौळ येथील व राजेश केशव राठोड रा. बोरगाव ता. आर्णी जि. यवतमाळ यांच्यावर महाराष्ट्र नरबळी व इतर अमानुष, अनिष्ट व अघोरी प्रथा व जादूटोणा प्रतिबंधक कायदा 2013 अंतर्गत कलम 3 (1 ) (2) व (3 ) अन्वये गुन्हा नोंद करण्यात आला आहे. दरम्यान पोलिसांनी घटनास्थळावरून सुमारे 3 लाख रुपये किमतीची महिंद्रा XUV चारचाकी तसेच जादूटोण्याचे साहित्य पंचनामा करून जप्त केले आहे.
या कारवाईत ठाणेदार विकास दांडे, पोलीस कर्मचारी पुकार वाकोडे, सागर केराम, अविनाश खाडे तसेच पथकातील इतर कर्मचाऱ्यांचा सहभाग होता. सदरची कार्यवाही सपोनि विकास दांडे, सफो प्रेमदास फुलके, पो. शि. सागर केराम, पुकार वाकोडे, अविनाश खाडे यांनी केलेली असून पुढील तपास PSI भाऊराव बोकडे करीत आहेत.